APRESIASI NASKAH DRAMATISASI CARPON “GEUS SURUP BULAN PURNAMA”

Carita pondok Geus Surup Bulan Purnama karya Yous Hamdan anu dimuat dina buku Sawidak Carita Pondok, PT Mangle Panglipur, 1983 eta carpon diraeh deui ku Hadi AKS jadi naskah dramatisasi carpon pikeun kaperluan pagelaran. Dina sastra Sunda dramatisasi teh kaasup barang anyar. Gelarna kakara dina taun 1970-an minangka pangaruh tina sastra deungeun. Wangun operet anu geus lila hirup dina sastra deungeun tuluy hirup dina sastra Indonesia, disebutna dramatisasi, anu harita mimiti dipopulerkeun ku Remy Sylado saparakanca jeung ku kelompok teater STB di Bandung. Ti dinya bisa jadi asal-mulana ieu wangun pagelaran tuluy tatalepa sarta hirup dina sastra Sunda. Dina pertengahan taun 70-an Yus Rusyana saparakanca anu ngadegkeun Liga Drama Bumi Siliwangi di kampus IKIP, milu mopulerkeun wangun dramatisasi. Harita kungsi dipagelarkeun “Wangsit Siliwangi” (Wahyu Wibisana), “Ngadagoan Si Jabang” (Yus Rusyana), jsb. Ti harita pagelaran dramatisasi teu kungsi kadenge deui. Kakara aya deui dina taun 1992, anu dipagelarkeun ku Godi Suwarna dina Pesta Sastra Sunda taun harita. (Hadi:47:2004). Jaman kadieunakeun dramatisasi sok remen dipagelarkeun ku barudak SMP atawa SMA, sakapeung sok aya ku mahasiswa.

Dina naskah dramatisasi carpon Geus Surup Bulan Purnama ieu digambarkeun kaayaan Bilal anu kacida raheut batinna, raheut atina sabab dikantunkeun pupus ku Kanjeng Rasul Nabi Muhammad s.a.w. Biasana parantos sering kakuping sajumlah riwayat anu nerangkeun kajadian demi kajadian nu kaalaman ku Kanjeng Rosul; -ti ngawitan babarna, isro mi’rajna, hijrahna, tug dugi ka lalakon perjoanganana di medan-medan perang. Nanging peristiwa pupusna Kanjeng Rosul, alum nguyungna para sahabat jeung langit Madinah harita, sok luput tina implengan urang. Suasana ieu pisan, suasana nalika Kanjeng Rosul pupus, anu diasongkeun ku ieu naskah dramtisasi. Pikiran jeung rarasaan urang dibawa ka hiji mangsa, hiji tempat nu kahalang ku anggang waktu rebuan taun, nyaeta bumi Rasululloh, suasana alumna para sohabat, juuhna cimata, sareng Bilal nu nyuuh, kalebuh dina kasedih jeung kapeurih batinna. Carita ieu leuwih nitik beuratkeun ka tokoh Bilal nyaeta muazin Rasul dina jaman harita anu kapercaya nyekel al-khumus, saperlima bagian Rosul, yati, miskin, jeung ibnu sabil tina harta rampasan perang. Anjeunna kacaritakeun nyuuh, leungiteun pisan nalika dikantunkeun ku Rosul dugi ka tungtung carita Bilal hamo adan pikeun sing saha bae, salian ti Rasululloh.

Sumber/Referensi: Panggelar Sastra karya Hadi AKS, Penerbit: Pamulang-Tangerang, Tahun 2004